دێ زڤرم
ئەز ڕێڤینگم
دێ شەقینم رێكا درێژ
ئەز رێڤینگێ
خواستنا بەژنا زەینێ مە
بلا لپێشیا من دە ھەبن
چوار كەلەمۆك
خەم پێ نینە
دێ دمە سەر
چونكە ژ رھێت
خوینێ
ئەز دێ ئاڤدم لێڤێن زەینێ
ھەمی رێكا دێ كمە كەر
خەم پێ نینە كێستە ونشتەر
دێ دمە سەر
دێ دمە سەر
ئەز رێڤینگم
چ لرۆژھەلات ورۆژئاڤا
چ ل ژێر ئو
چ بەر ب ژۆر
من دایە رێ
كحێلا بۆز
چو پەسار لێ نابن ئالۆز
رێڤینگێ پێلێت پێلانم
نێزیكە دەم
دێ زڤرم
بیكە (بوكە) زەینێ
دێ پشكورم
زەینۆ شێرینا دلێ من
ھەمی ب تە دل ڤەكەرن
ئەو دەمێ تە
ب خەملینم و ب خوازم
كەیف وشاھی وئاشتیە
ل بەر دەرگەھێ تەڤ مالان
رۆناھییە
ئازادیە
پەرچەما تە بلند دكم
زەینەبا من
رۆژە، سەیرانە خوەشیە
ئەز رێڤینگم
دێ زڤرم
ب خوینا خوە
دێ تە كرم
ب سەربەستی
دێ راموسم وان لێڤێن تە
ھەر وھەر ئەز دێ زڤرم
دێ زڤرم
دێ زڤرم
13.10.1984 سێمێل – كوردستان
بەنگین سولیڤانی
