چپكەك ژ ژیانا من

#- ژ دایك بویێ سالا 1965ێ مە ل گۆر پێزانیبێن خودێ ژێ رازی دایكا من، ل گوندێ باتێلێ سەر ب قەزا زاخۆ ڤە.
# – ژ ئەگەرێن شۆرەشێ خوەندنا سەرەتایی تا بۆلا چوارێ من ل باتێلێ خواند و ئەم چۆینە ناڤ شۆرەشێ سالا 1974ێ. ژیێ من هینگێ ۹ سال بون. ل گۆر رەحمەتیا دەیکا من گۆتی، 🤫
#- ل ڤەگەرانێ سالا 1975ێ ئەم چۆینە باتێلێ گوندەكی وێران سۆتی. پشتی مە گوند ئاڤەدانكرین ل مەھا ئاڤدارێ، رژێما گۆر ب گۆرا بەغدا جارەكا دن گوندێن دەڤەرا سلێڤانەیا تەڤ وێران كرن و خەلكێ دەڤەرێ پرتی بەلاڤكرن ل مەھا یازدە-دە ھەمان سال و د سالا دوڤرە كۆمەلگا ل دەڤەرا مە بۆ ئەرەبا ئاڤاكرن، تنێ گوندێ ئاسیھێ ل دەڤەرا سلێڤانیا ھێلان ئاڤاكری ئەوژی ژ بەر ھندێ كو پێشمەرگە ژ بەر سلامەتیا خەلكێ وی گوندی ھێریشا نەكن سەر كۆمەلگایێن داگیركەرانەیێن ئەرەبا..
#- پۆلا چێنجێ سەرەتایی من ل گوندێ ئاسیھێ خواند و ئەز ل مالا مامێ خوە خودێ ژێ رازی عەبدولە عەلی بوم. ژ بەركو ئەم بربین گوندەكێ پشتا دوھۆكێ ئەگەر دورست ل بیرا من بت ناڤێ گوندی دۆستەكا بی و چەند مالەك لێ بون و خواندنگەھ نەبو.
#- مالا مە ھاتە گوندێ سۆركا و پاشی بۆ باژێرێ سێمێلێ، من خواندنا خوە یا سەرەتایی و ناڤنجی ل سێمێلێ ب دوماھیك ئینا، ل پۆلا چوارێ ئامادەیی من ب فەرمی دەست ب كارێ نھێنی یێ رێزانی كر ل گەل پارتی  گەلی و ھندەك گرفت دەركەتن ھۆلێ د ناڤبەرا من و ڕێڤەبەرێ خواندنگەھا ئامادەیێ یا كچ و كوران ل سێمێلێ، سەرئەنجامێ ڤێ چەندێ من خواندنگەھا سێمێلێ ب جھ ھشت و سالا 1981ێ ئەز چۆم خواندنگەھا ئامادەییا بازرگانی ل پارێزگەھا دوھۆكێ و من سالا 1984ێ ئەو خواندن ب دوماھیك ئینا..
#- سالا 1984ێ من دەست ب نڤێسینا ھەلبەستان كر، پالپشتێن من كورمام و ھەڤالێ من یێ بەرێز، پێشمەرگە، وڵاتپارێز و ڕێڤینگێ دۆزا گەڵ فەھمی محەمەد، ھەڤالێ ھەلبەستڤان و هەڤالێ خزمەتا رێزانی یا نهێنی و زیندانیێ رێزانی بەرێز ھشیار ڕێكانی و خودێ ژێ رازی ماموستا، پەیامنێر و دەستنڤێس رەمەزان عیسا..
#- ل ناڤەندا سالا 1985ێ من ھزرا دەئێخستنا گۆڤارەكێ كر ل باژێرێ سێمێلێ لێ گۆڤار ببت گۆڤارەكا سەرانسەری، ئەڤ ھزر پتر ھاتە لڤاندن ل سالا 1986ێ و مە شیا چەندان ھزرڤان، رۆناكبیر و دەستنڤێسان ل دۆرا ڤێ ھزرێ كۆمڤەكین. من ناڤێ كۆڤارێ كر تیرۆژ و شێوێ بەرگێ وێ ژی من دەینا و من پێشكێشی بەشداران كر و تەڤ رازیبون، ئینا مە بەرھەم كۆمكرن و شەڤەكێ خودێ ژێ رازی و ھەلبەسڤانێ ب ناڤ و دەنگ و وەلاتپارێز سەبری بۆتانی ل مالا محەمەد ئۆسمانا ل سێمێلێ ل مە بو مێھڤان و بەشداریا خوە نیشاندا، مە بریار دا كو خودێ ژێ رازی رەمەزان عیسا و بەرێز محەمەد ئۆسمانا ب كارێ چاپێ رابن ژ بەركو ھەردو پەیامنێر بون و ئینا مە تەڤ بەرھەم دانە دەستێ بەرێز محەمەد ئۆسمانا كو نوھە ل باژێرێ سێمێلێ د ژیت. ژ بەر ئاشكەرەكرنا كارێ من یێ رێزانی یێ نھێنی ئەز دەركەتم پێشمەرگاتیێ ل ھاڤینا سالا 1986ێ و خەبەر گەھشتە من كو زەلامێن رژێما گۆر ب گۆرا بەغدایێ چۆنە مالا بەرێز محەمەد ئۆسمانا و تەڤ بەرھەم ژێ ستاندنە. پشتی سەرھلدانا پیرۆز سالا هزار و نەهسەد و نۆت و یەکێ و ڤەگەرانا پارتییێن كوردستانی بۆ دەڤەرێ، دەرفەت چێبو كو ھندەك گوەنجێن سێمێلێ ئەڤ گۆڤار نوكرن و چەند ژمارەیەك ژێ دەرێخستن و ھزار جاری دەستێن وان خوەشبن. بێ گۆمان پشتی دەركەتنا من مالا مە ژی و ھندەك ژ ھەڤالێن من ژی گەلەك دەستنەخوەشی ژ رژێما گۆر ب گۆرا بەغدا دیتن، یەك ژ وان برایێ من خالد ئەحمەد عیسی ژ سێدارێ رزگار بو و ھاتە حوكومكرن بۆ 20 سال و دەیكان ئاڤێتنە ناڤ چیای، برایێ من یێ مەزن عیسی ئەحمەد برنە ئەمنێ و چەند تلێن وی خەلاندن ژ قوتانێ و برایێ من یێ بچویك عزەدین ئەحمەد ژ خواندنا وی دویركرن و بریارا سێدارا غیابی ل سەر من پەژراندن… .
#- پشتی خۆپانا سالا 1988ێ و ئەم كۆمەك دەربەدەری كردستانا باكور یا داگیركری بوین و من تەماشەكر كو ئەڤ زارۆك مانە بێ خواندن، ئینا من دانو ستاندن ب گەلەك دەیبابان كر ل کامپا سەیرانتەپە ب رەخ باژێرێ ئامەدێ ڤە كو ب ھەروە خواندنێ بدم زارۆكێن وان و تەڤا پشتگیریا من كر، نەخاسمە مالێن خودێ ژێ رازی خال سەفەر دوبانکی و مالێن خودێ ژێ رازی خال رەشید تەمەراڤای و من ل سالا 1989ێ خواندنگەھ بۆ زارۆك و مەزنان ڤەكرن و ھندەك كەسێن خواندەڤان ژی ھاریكاریا من كرن بۆ دەرسدانێ مینا خودێ ژێ رازی حەجی بۆسەلی، مەجید بۆسەلی، عەلی رەشید تەمەرئاڤای و دژوار سلێڤانەی. مخابن ب گەفێن میتا توركان د كەمپێدە خوەندنگەھێن مە ھاتون ھلوەشاند ئەوژی ب دەستێن و گلییێن سیخورێن كورد. ل سالا 1990 ێ ئەز چۆم یۆنان و ل ئەسینا پایتەخت مام، ل وێرێ من رێكخراوا پارتی گەل ب رێڤە د بر، دەما سامی ئەبدولرەحمان ل سالا 1991ێ ل گەل سەركێشێن دن یێن پارتیێن كوردا چۆنە بەغدا و رویێ ژەھراویێ سەدامێ گۆر ب گۆر ماچی كرین، ب فەرمی من ئیستیقالا خوەدا و دەركەتم بۆ وەلاتێ دانیمارك.
#- سالا 2009ێ من مالەكا كورد ب پرۆگرام و دەستەیەكا رێڤەبەریێ ل باژێرێ ئۆدەنسە ل وەلاتێ دانێیمارك دامەزراند و ژ تەڤ پارچێن كوردستانێ تێدە بەشدار بون.
#- ل سالا 2011ێ من ئۆرگانیزما خێرخوازی یا دلخوازانە ب ناڤێ ” ڕۆژا سۆر ” دامەزراند و كارێن خێرخوازی یێن گەلەك مەزن مە پێشكێشكرن و ئۆرگانیزما مە بەردەوامە و چەند چقێن وێ ژی ھەنە بۆ نمۆنە ل باشور و رۆژئاڤایێ كوردستانێ.
جارێ ژییان ھێشتە بەردەوامە، سلاڤ بۆ تەڤ بەرێزان